嘉嘉就快十九個月大了，真係愈大愈曳，記得以前佢真係好乖，好鐘意笑、好少扭計、就算扭計只要分散佢注意力就 OK、唔多喊 ( 一星期都無喊一日 )， 點解而家會變到咁曳豬架?....
脾氣又越嚟越差，越嚟越惡，想點就要點，要咩就一定要咩，唔鐘意唔順意就勁喊、拗腰，嗰日喺鄰居澔澔屋企仲訓埋地，真係失禮死人！
一般的爭吵，我都堅持不屈服，一般嘉嘉吵鬧一會就會無事，但其間羊生又唔捨得嘉嘉喊甘耐，不斷想息事寧人，我當然很不甘心！眼看著將要成功時，羊生又一副心痛的樣子.......仿佛我是"蝦"細路的大壞蛋，我真係好嬲！
平心靜氣同佢講 No No，唔可以咁架，換來的，只係越嚟越癲，其實佢發緊脾氣，根本乜都聽唔到，睇唔到。一向 EQ 低的我，就會發癲，見到甘更加會打佢手手。每次打她的手手時，她和我的心都哭個不停。原來這對於我和她來說都只能是一種傷害。
看到“管教”一詞的原意是教育，而不是懲罰。這種教育的目的是自我控制，幫助妳的孩子學習並了解“我不能這麽做，我不會這麽做。”
所以我而家會嘗試學習放低佢，由佢喊，由佢發癲，我會唔理佢，嘉嘉當然更加喊到拆天啦！就係等佢知道，佢發脾氣係佢唔啱，最愛嘅媽媽會走左去唔理佢，對我嚟講都係好，起碼比自己冷靜一下，又唔駛打多佢幾野！
之後等佢冷靜少少，我會抱返起佢，等佢受到教訓就算......希望佢下次會記得發脾氣之後，媽媽會走左去唔理佢。
其實我好無奈，唔識得點教佢，真係唔知可以點教?....對於情緒失控嘅嘉嘉點聽人講?......但幾難教都要教，我真係唔想佢變成一個要風得風嘅小朋友，將來一受到挫折就受唔住.....如果連媽媽都冇心機教佢，仲有邊個肯了解佢?......
我會不斷去試，先可以揾到配合嘉嘉性格既方法，找一個最適合教導嘉嘉的方法，未必係最正確，但至少係我嘗試過鑽研出來的，我會繼續努力！盡量令自己唔好甘生氣！而且發脾氣對教仔係唔會有幫助，我相信我會同嘉嘉一同成長！
湊仔方法人人識講，應該咁咁咁，點點點
但真係要實行的時候，都要睇下自己個女受唔受
知道湊仔應該任何時候都保持冷靜
經常要有十足耐性同面帶笑容
但有時。。。呢期。。。真係做唔到。。。
2009年1月30日 星期五
教導小朋友....
2009年1月29日 星期四
年初四 Strewberry Day
昨天年初三留在家中屋企無出街，好HEA甘休息了一整天。
今日係年初四，羊生已經復工喇，我和嘉嘉就訓個夠，心肝懶到十一點才捨得起身，然後我倆去了飯堂開動，突然收到阿姨來電，問我們一起去摘士多啤梨好不好，我們一行九個人就齊齊去了元朗摘士多啤梨呀！
我第一次去摘士多啤梨，所以唔知呢度算唔算大，不過佢就係 FREE 入場費，因為我知錦田鄉村俱樂部新春期間未摘已經要收 $88 入場費喇，呢度摘幾多就磅多少，盛惠 $45 一磅！
這是嘉嘉幫手剪的士多啤梨
你睇下幾大粒，嘉嘉十分興奮和雀躍，嘉嘉揀的都是又紅又大。
突然嘉嘉一口咬落士多啤梨度
已經急不及待地享受了
囡呀！未洗架！會唔會好唔衛生?
算啦....起碼無防腐劑
( 根本阻止唔到 ) 
然後一粒一粒放落口，我見嘉嘉食到啲汁滴晒出黎
其實呢度係謝絕品嚐架!!!! 所以嘉嘉偷偷吃，又偷偷望。
但係佢同 Sunnie 表姐有理無理就一邊摘一邊食
姨婆話大菌食細菌，又摘了一個士多啤梨BB俾嘉嘉。點知嘉嘉就嫌棄太細個，放了入我口。
真係又甜又多汁，好好味呀!!!! 難怪嘉嘉不停吃不停吃啦!!!!
當我走去付款的時候，嘉嘉一步也不肯離開，勁搞笑!!!!!
可惜帶回家後，有些士多啤梨已被壓爛，唯有快快洗乾淨吃掉好了，還分了一些給鄰居澔澔 BB 食。
2009年1月27日 星期二
大帽山甲龍農場
年初二一朝早我哋就返咗去同爺爺嫲嫲飲茶
然後就返左娘家食開年飯，Busy
跟住我哋去咗甲龍農場鮮奶走一轉
同行仲有 M麥M 一家
這裡出奇地發現有飼養黑羊，那黑羊跟牛奶有什麼關係呢？
我諗極都諗唔明.....
嚟到呢到，梗係要order返碗薑汁撞奶啦！薑汁撞奶仲要係即撞架，約等五分鐘左右，薑味適中、奶味濃郁，好滑........ BB 都好鐘意食。
麥先生個餐蛋麵似乎都好好味甘樣！
食飽飽後，我們就去睇羊仔，好得意架，一見有人行近，就會走埋嚟呢！一定係以為有野食喇......
Sunnie仲問農場職員攞左啲麵包條餵羊羊，估唔到羊係鐘意食麵包既。
兩位 BB 見到啲羊羊都好緊張和開心
之後我地沿大帽山行，山上特別大霧，真係一步一驚心呀！前面乜都望唔到，行極都仲有，永無止境咁，真係不太好受。
在迷霧中好辛苦先黎到大帽山腳嘅停車埸，落車俾嘉嘉捉下霧先......
呢個位已經好大霧，大霧到啲衫同頭髮都濕晒，仲好凍好凍，所以我地都無繼續上山頂喇!!!!
2009年1月26日 星期一
贏在起跑點?
我一直有閱讀朋友綱誌的習慣，甚麼年紀的BB也愛看，看別人的綱誌，總會給自己多一點靈感，如何教導嘉嘉，也可以看看放假遊玩有咩好去處。
~~初出世的bb，話題總圍繞住有無食人奶，食到幾多安奶，依家幾重....
~~3個月開始，大家就關心BB幾時會轉身，幾時可以坐起來，食固體食物未呀....
~~接近一歲，父母既話題又會轉到識行未，識byebye未，識kiss未.....
~~到了一歲，又會聽到坊間流行研究BB識認顏色未，識配對未，識講野未，識A-Z未，戒片未，識自己食飯未，戒奶咀未，識做家務未，食飯仔未.....
然後又會發現，當自己既小朋友學識"神乎其技"後，就會說客套話: 我寧願佢爬多啲喇... 我寧願佢....... 好蠢架咋!!! 又或者當自己小朋友未如朋友既小朋友乖巧時，就會跟自己，朋友，親友說: 怕咩吖！遲早都識架啦!!! 我又唔擔心，健康咪得囉......
作為新手媽媽，老實說，我都幾希望嘉嘉 " 快人一步，理想達到 " !! 然而今天，跟婆婆談起嘉嘉還沒有學懂xxx 還沒有xxxx，再加多句，人地阿xx個仔已經xxxxx 嘉嘉好蠢.....
婆婆一句: 要咁快做咩呀，遲早都識架啦~~~~!!
我就話: 快啲識，叻啲嘛.....
婆婆又說: 咁早識左，第日上堂咪好悶，甘佢人生會好dry架~~~!!!
『 ........................................ 』
是的.....彼此既比較，永遠都沒完沒了..... 在平衡自己唔好與人比較既同時，咁究竟..... 應該點去"教"嘉嘉呢?! 如果真係遲早都識..... 理應真係無咩駛教.... 所有野都可以隨心隨意任佢自由發展.....
唯有再給予嘉嘉多點耐性，每位BB都需要時間成長，父母不要比較之餘，亦都要給多點體諒自己孩子，因為其實佢地都好努力咁成長緊.....
2009年1月25日 星期日
送鼠迎牛..恭喜恭喜..
恭喜發財!!! 祝大家牛年行大運，身體勁健康！！
羊公館，牛年的準備
攪掂未呢？
新年送禮佳品
全部 ready ~~~~~~~
嘉嘉的新年衫
ready ~~~~
@ Polo Ralph Lauren
保証嘉嘉年初一到初五都有新衫著
哈哈
仲有幾個放利是嘅Bag
婆婆..姑媽一早準備
我同羊生就買了兩對鞋
...
...
羊公館已經 ready
大家又 ready 未呀？
我都好鐘意過農曆新年架
聽日就係啦！
好開心呀 ！
