吃母乳的幸福寶寶

 

這是嘉嘉兩個多月日吃夜吃媽媽奶的成績

給嘉嘉吃母乳的過程真不簡單，初初嘉嘉要在兒科觀察48hrs，所以唔可以一開始就給她啜，當她吃了兩日奶樽奶粉，埋身唔識點啜，於是弄損了我，好痛，我每次餵人奶時都要咬住件衫忍住痛，也曾想過放棄，後來母乳專科護士教了正確餵法，嘉嘉就成功食咗15分鐘，真係好感動好開心！因為自已終於掌握到BB點食奶才算正確。

到嘉嘉食到奶，但係有時食完仲會喊，身邊人都質疑 "是否未吃飽???" 搞到自己好怕她哭，好似餵佢唔飽咁，心情低落。後來同母嬰院姑娘傾，打去衛生署熱線問，加上向朋友指教，然後每次去磅重，嘉嘉都重得好好，就證明佢食得夠啦！

然後返工後嘉嘉要學習用奶樽食奶，我提早一星期俾佢試，第一次哭了半個鐘，第二次又哭了15分鐘，但當我埋身餵，就完全冇問題，証明嘉嘉最愛吃媽媽奶，好無奈自已不是全職媽媽。

在上班時間姨姨會替嘉嘉餵2餐日本森永奶粉，但嘉嘉只會吃2、3安，所以回到家後我會給嘉嘉埋身食，原本諗住咁辛苦，餵1個月算.....但係餵餵下又得喎，餵2個月啦.....2個月不如再餵多1個月啦.....

其實嘉嘉返到我身邊吃奶，是我們最最親密的時候.....將來嘉嘉不用再埋身吃媽媽奶時，我都一定會好懷念呢種感覺呢......

我仲好努力餵母乳，因為我相信母乳含有抗體，是最健康，最有營養的。希望嘉嘉吃了抵抗力都會比較好！由於母乳濃度比較希，容易消化，因此寶寶會較容易肚餓，(平均一至二小時就會感到肚餓)，所以我要勤力餵餔，就算連晚上睡覺也要給嘉嘉密密餵，密密食......雖然有時會覺得沒一覺好睡，但我還想餵多一段時間呢，因為這是我送給心肝最好的禮物，她擁有健康的身體，就能一生受用。