嘉嘉第二次賣旗

今日一朝早，我就同嘉嘉去左沙田做小義工，幫助元朗大會堂賣旗。

今次已經是跟嘉嘉第二次賣旗了。我們早上未夠八時已經起床去到沙田大會堂附近進行賣旗活動，平時嘉嘉返下午班，所以要我地甘早爬起身都幾辛苦，不過可以幫手做善事，一次半次無所謂啦。


 

起初嘉嘉好怕羞，完全唔夠膽叫人買旗，後來我叫佢勇敢D，終於嘉嘉都肯踏出第一步：唔該可唔可以幫我買支旗呀??

但好可惜.....呢個行人係掂行掂過既！我鼓勵佢：唔緊要啦，可能姐姐趕住返工呀！然後嘉嘉再試多一次：唔該可唔可以幫我買支旗呀?? ((明顯地，今次細聲左好多.....)) 點知呢個哥哥都係無停低既((嘉嘉好無奈望住我問我：媽媽，點解D人會甘架??))。 然後我就話：哦，唔緊要啦，可能哥哥無散銀啦，不如比媽媽試下吖....

我想像唔到，我地連續問左28個途人，都無一個有心人肯停低幫我地買一支旗((係咪我地太樣衰呢??)) ((見到D途人左閃右避，忽然間，我覺得自已好似一個有傳染病既行乞者，拖住個女去乞食，但我明明係一個無收分亳既義工))




我好唔明白，香港買旗又沒有限定入幾多錢，就算只是一毫，也是一點善意，給賣旗者的一個支持。點解甘簡單的一個動作，跌左都唔執既幾亳，呢D人都唔願意付出??

自已都係一個內向的人，但基於作為媽媽的立場，應該要鼓勵女兒繼續加油！不能輕易放棄和感到氣餒！我笑笑口安慰佢：你繼續問下一個啦，一定會有一個好心人出現既。但係你唔肯出聲問，就一定連呢個機會都無架喇！！

好彩，終於有一個哥哥仔肯同嘉嘉買第一支旗。嘉嘉同佢講：哥哥，你真係好，我地等左好耐喇，終於有第一個錢。然後哥哥話：今日好曬呀，你要記得飲水呀，努力D喇~~ 如是者，隔幾個都有一個半個肯同嘉嘉買旗，有個學生哥同我地講：唔好意思呀，我得兩蚊咋！嘉嘉話：唔緊要架，幾多錢都得架！！是的，就算只是那一分幾毫，你們的善心，都比那些左閃右避的人多很多......




不得不說，跟小朋友賣旗確是一個好好的生活體驗。

首先要練膽量，要教她有禮貌地去和別人打招呼，然後申明自己的目的，再學習接受別人的拒絕，和有禮貌跟對方道謝或道別。

經過一輪欽坷的賣旗經歷，我們終於可以收工了，雖然成績不是太好，不過總算為咱們社區盡了點力。