始終要入院.....

13/02/09 (Fri) 嘉嘉凌晨五點開始發燒，我立即餵嘉嘉食退燒藥，到下午嘉嘉仲有高燒，我同羊生就帶咗嘉嘉去睇醫生，醫生就話嘉嘉無其他病徵，睇多佢兩日啦，可能係出疹啫，但成晚就燒下停下，訓咗又喊醒。

14/02/09 (Sat) 嘉嘉食住藥都燒，就算食咗退燒藥都要成個鐘先退燒，但到夠鐘既時侯又燒番，我同羊生成晚金精火眼住嘉嘉。等多一日就知係咪出疹喇。

15/02/09 (Sun) 羊生留咗喺屋企照顧嘉嘉，話嘉嘉有返啲精神，以為係開始好返，正在康復中。

16/02/09 (Mon) 初頭懷疑的出疹，成3-4日都唔出，我哋估應該只係普通傷風感冒，而且尋晚到今朝早上都無再發燒，所以仲老定走去迪士尼玩，而且呢日成日都無發過燒。

17/02/09 (Tue) 早上都無事，收工返媽媽屋企食飯時又再發燒，仲越燒越高，飛的返荃灣幫嘉嘉塞一粒塞肛藥。

18/02/09 (Wed) 早上都係無事，下午又再高燒，想去睇多次醫生，點知佢是日休息，羊生就帶咗佢去睇第二個醫生，醫生就建議入院檢查，即刻寫張紙俾我哋。

唔知點解，呢啲說話由醫生親口講，就覺得好嚴重，我同羊生都好緊張，即係送嘉嘉入港安睇，雖然個醫生話而家政府醫院啲設備都好好，但羊生話燒咗甘耐都未好，嘉嘉又高燒緊，唔想去政府醫院左等右等浪費時間。

去到港安之後，竟然無床位，要等兩個，等了兩個鐘後有人退房，就再比嘉嘉食多次退燒藥水，然後醫生話發燒要做一連串檢查，照肺X-ray、抽血同抽鼻液檢查。

當2個姑娘帶咗嘉嘉入房抽血，我就聽到嘉嘉的哭聲和尖叫聲，仲喊得好淒涼，真的非常不好受，大聲同嘉嘉講：唔駛喊架，好快就得喇，你收聲先，收晒聲媽媽就入嚟陪你，嘉嘉即刻就收咗聲，只係仲有少少悲鳴，但因為姑娘仲未得嘅關係，我唯有拖延時間話：仲喊嘅？我少少聲都唔要聽到架！嘉嘉就連嗰少少悲鳴聲都收埋，但姑娘仲未得，我話，媽媽行緊入嚟，你等多陣........可能嘉嘉見我甘耐(20秒左右)都仲未入去，又再大喊，我越聽個心就越實，越聽就越難過，暗罵姑娘搞甘耐................

醫院有陪床可以俾家人留喺到陪BB，我睡在嘉嘉側邊，因為羊生明天要返工，所以我就叫羊生回家睡得比較好，而且又可以執一些嘉嘉的日用品過來醫院。

嘉嘉一路都仲有喊，我聽到佢喊我又想喊，但因為要照顧嘉嘉唔可以比自己喊，驚會嚇親佢。可能嘉嘉適應能力比較強，沒有吵鬧哭著要回家。

深夜時份嘉嘉又開始發高燒104度，就幫佢貼咗張退熱貼


19/02/09(Thu)

今朝一早起身(6:00am)開奶俾嘉嘉飲，一望到佢個樣，成塊面都是血跡，點解無端端流鼻血架? 嚇死我喇，姑娘話已經停咗，再觀察下有無再流，我哄佢再訓番，嗰時我啲眼淚開始好似開水喉咁不繼流出嚟，我真係好擔心。

醫生早上來巡房，說不是流感，都沒有肺炎，放心了一大半，只係左耳內有小小紅，但如果一直唔退燒就要打針藥入身體，唉，什麼時侯才退燒？仲話流鼻血可能係抽鼻液時弄損了鼻黏膜，塗些藥膏就好了。

下午，媽媽、姨姨同姐姐買咗好多嘢過嚟探嘉嘉呀！

羊生仲執咗啲書仔過嚟俾嘉嘉睇

醫院 Look

下晝3點幾開始有少少微燒，沖完涼舒服少少，就成日要行來行去

Our Dinner： 港安無肉食架，全部都係素食餐

入院發覺真係好多小朋友病，唔知點解啲病菌會咁利害，個個都發成個禮拜燒，又喊到死，家長們都好辛苦甘照顧佢哋嘅BB。

一向都知道小朋友生病，最心痛和辛苦一定係做人父母兩個，依家真係不幸地嚐盡心痛嘅滋味，冇得訓唔緊要，但見到BB咁慘就真係好唔開心.....寧願病嗰個係自己，打針食藥嗰個都係自己。