首次一家四口去布吉的玩後感

跟嘉。渟第一次的親子旅行眨下眼就過左一個月。。。。有好多朋友都關心我同羊生，要帶住兩個小朋友去旅行，會唔會好辛苦呀??


老實講，我同羊生由始至終都唔會用「辛苦」黎形容一家人去旅行，因為去旅行其實係一件好值得開心既事 ((可能有些父母會覺得好辛苦，正如有些父母都覺得，要湊住兩個小朋友落樓下公園玩都係好辛苦一樣，所以呢個純粹是個人 mind-set 的問題))；而且我同羊生，真係唔捨得亦做唔出，放低兩個心肝寶貝，然後兩公婆自已去旅行，所以我地一家四口齊齊出動係理所當然！！


羊生經常說，到孩子再大o的，到時你想同佢地去旅行，佢地都唔想同你去.....那時候，我地就開始自已的二人世界之旅。小朋友成長速度好快，唔好話去旅行，過幾年就連我地想攬攬鍚錫都未必批准，所以我同羊生都好珍惜.....現在每一個可以同佢地一齊去遊歷、去體驗呢個大世界既機會。


有了以往的經驗，我們的事前準備都比較充足，最重要是，我們有一個很會照顧妹妹的嘉姐仔，加上渟渟的超合作，所以，我對於我們的第一次嘉。渟旅行，是有一百個開心和滿意。


有朋友又會認為，小朋友甘細個都唔會記得自已去過旅行啦！其實之前我都有o係blog同大家分享過，無錯~~佢地真係未必會記得晒，我個人亦承認，跟Baby去旅行的記憶，應該只是屬於父母。不過在旅行當中，可以令孩子大開眼界，感受世界另一個地方的風土人情，我相信佢地一定可以得到一個很好的體驗。 第一次帶Baby去旅行，我建議最好都是選擇一些比較輕鬆的行程，同時亦要預留 / 把握午睡小睡的時間，因為Baby的體力未必能支撐到一日，到時扭計大喊唔肯食野就麻煩。


第一次坐飛機外遊的渟渟，坐飛機飲奶食飯訓覺去廁所，各樣都好乖好聽話，真係令我好意外，可能屋企始終日夜都係Auntie湊，自已無咩信心take care佢外遊5日，估唔到渟渟甘大膽，由上山坐大象到下海餵小魚，通通都唔驚；至於遂漸長大的嘉姐仔，成兩年幾無去過旅行，佢表現得相當興奮，而且有了妹妹的陪伴，沿途有伴就更加開心，難得懂事的嘉嘉，知道家中不是富有，明白旅行需要花費很多，主動說把所有的利是錢都交給了我。那五天更對妹妹百般遷就，處處容忍，就是不想我和羊生去旅行時發脾氣 / 不開心，我和羊生都有一番感受。



我們的十年前後在布吉，雖然少了一份浪漫，卻多了一份感恩和一份感動；就算湊住嘉。渟去旅行，我們一樣可以很享受，尤其看見孩子在旅遊中得到的體驗.....在大自然中去看、去聽、去聞、去觸摸、去感受和嘗試的成長紀實。有了這些動力，我和羊生也要更努力，計劃我們的下一次家庭旅行。。。。