選小學

開始要煩惱為嘉嘉選小學，為人父母，總想處處為自已的子女打算，香港填鴨式教育係人都知，自已都領教過。但自已又無諗過俾嘉嘉讀國際學校，因為話曬都係中國人，我覺得中文一定要識，可以的話，我絕對唔會送我啲女去外國讀書，所以IB課程唔啱我。


我住呢區又無心儀既小學，所以我會考多幾間直資打底，因為我鐘意直資用英文授課，可以緊接英中；不過如出名的直資，如陳守仁、培正、SFA...........，其實又真係未必有把握考到。 所以我決定漁翁散網，考多幾間，有殺錯冇放過，況且我唔一定揀一線，其實二線我都無所謂，最緊要係英文小學就OK，我們很隨意的，假如嘉嘉讀到書，讀邊一間也沒所謂，假如讀不到，即使去到最好的學校也會考包尾。


我都會參加大抽獎，萬一衰起上黎，心水的學校唔收嘉嘉，大抽獎又派唔到心水學校，都叫有間小小的學校俾嘉嘉踎住先，唔駛走投無路，就算街坊福利會小學都會讀。不過無運就無好學校，唔想等運到，就唯有努力去考直資。


直資學校的靈活性較大，可自行收生，自行決定課程，學習環境和資源會較政府全資的學校好。小朋友又可靠自己實力考入，不需要看只看運氣。不過現時直資學校的需求很大，報名的學生很多，競爭十分大，往往一間學校會有數千人學生報名，但只有百多個學位，風頭比傳統名校更甚。如果要成功入讀這類直資學校的小朋友必須是很突出，盡管如此，家長們都會努力嘗試，操練小朋友，入讀不同興趣班，希望他們能入讀心儀的學校。 


今時今日，乜都講名次，排成績，大家為了名列前矛/唔想墊底，就益晒d補習、公文中英數、珠心算.......，為了唔執輸，個個家長都要小朋友額外再做機械式操，唉...........