我替女兒R背脊

患上濕疹的嘉嘉，每天睡前，都愛我為她"R"背脊.....

"R"著"R"著... 嘉嘉就會平靜下來，默不作聲，在享受著，然後...慢慢入睡...

雖然很累，有時"R"到手都軟了，嘉嘉就會提"醒"我：快o的"R"啦

想起鄭丹瑞N年前的那首歌.....

當年，我還是小孩子，也渴望被媽媽摸摸，親親.....

今天，我卻為自己的女兒，送上這一幕.......

每天上班下班，身體都會感到很重... 疲累不堪...

早上起來，就帶你上學，然後上班，下午接你放學，然後哄你午睡，回家後，給你做過功課，又再準備晚飯...

有時來不及準備，點外賣就會給你責罵 (唔好又叫外賣啦 ~)....

還有空的時間，更想給你多點的親子時間，做些小手工.....

然後再看一會電視.... 才一起上床休息.....

嘉嘉.......這3年多來，你實實在在的讓我成長了一萬倍....

媽媽的失落，不快樂，壓力..... 都因為你，努力的，慢慢的克服過來....

想起你，想起你的話，想起你的笑... 我還哭什麼?! .......

嘉嘉, 多謝你!!!

這數月的情緒，都因為你，慢慢的舒緩起來..... 痊癒起來.......

我會用最輕鬆的心情... 迎接妹妹的來臨......

賀年衣服

學校為左想令小朋友感受一下新年氣氛

特意叫同學仔穿著賀年衫返學

嘉嘉著住件賀年衫不知幾開心

俾隔離鄰舍等人激讚

貪靚既佢緊係受晒

家傭鎖事

2011年1月22日，我人生第一位傭人出現了 !! 呢位姐姐來自菲律賓，之前在香港已做了9年，佢個仔仔都有十幾歲喇，仲讀緊書.......

由於佢o係香港做左咁耐，所以佢既廣東話都OK，我地溝通完全無問題，暫時都唔駛我教佢煮飯，味道就普普通通啦，不過我都無咩特別要求既 !! 至於人品方面，暫時返左幾日工，都算幾好啦，肯自動自覺做家務，而且都幾乾淨架 !! 佢可以全日不停咁工作添 !! 不過，呢d野都係睇定d，始終岩岩返工，點都要扮下勤力架嘛，過多幾個月，分分鐘露出原形～！（希望唔會啦！）

其實面對工人姐姐的出現，真係有點忐忑架，始終我咁大個女，都未試過有工人服侍，一直以來我都親力親為，就算生完嘉嘉，半湊半返工，我都自問可以打理好個屋企，又照顧到個女，都算合格啦 !! 不過自從有左小bie，情況就好唔一樣，體力不繼，根本無可能好好安胎既同時，又要返工收工湊女放學溫書做功課煮飯，情緒又愈黎愈差，我簡直快瘋了！

再加上第日小bie出世之後，要保母姨姨照顧我兩個小朋友真係無可能，因為佢個孫已經有幾個月大了，即係要佢湊三個，顧得個孫又邊得閒埋我兩個吖，真係太吃力了!! 所以，思前想後，都係請個外傭返黎，雖然湊小朋友的主要任務仍然係我同羊生，但起碼有人幫手做下家務，煮個飯俾羊生食，咁都差好遠啦!!!

而家工人姐姐黎左幾日，幫我將廚房及廁所大清洗一番，我終於見番一個乾淨企理的toliet，真係好開心呀~~~仲有人定時定候幫我洗衫，唔駛再三催四請羊生去幫忙（其實我知羊生而家返工都好辛苦....），咁對大家都係最好呢～

不過，要去handle一個外人，我仍在學習中，太善良我又怕被對方睇穿我好好恰，但自問又惡唔起喎 !! 若果太嚴厲，我又覺得好似太殘忍，人地離鄉別井打工都好辛苦架嘛 !! 呢方面羊生就比我堅定，希望佢不時提醒下我，等我唔好咁易被人洞悉到我「心軟」既弱點啦～～～

嫲嫲生日+團年飯

今年嫲嫲的生日臨近農曆年尾，所以生日與團年飯一齊食埋

羊生話屋企人唔想我大住個肚行黎行去，就揀左過黎元朗大榮華食飯。

大榮華著名的的圍村盤菜，很多人都冒名而來。

不過我最欣賞的就是『奶皇馬拉糕』，連食飽左飯既嘉嘉都忍唔住連食兩件，果然是有水準!!



姑媽佢地仲買左個蛋糕飯後切

吃前當然少不了和嫲嫲合照

祝嫲嫲生日快樂 !! 身體健康 !!

工人姐姐煮的第一餐飯

尋日工人姐姐剛到步，開工的第一日，婆婆就同文姨姨、紅姨姨 & 姨丈一齊黎左我屋企試菜，唔知有無嚇親Auntie呢??

都算係咁啦 ! 味道都唔錯 !

工人姐姐到

今日，我地早左收工出去尖沙咀接工人，感覺上，我都幾鐘意呢個工人。第一眼見到佢，我就覺得佢都幾 nice，而且當我地同個 Agent 傾緊o的合約細節時，佢就好"醒目"甘湊住嘉嘉，我見嘉嘉都無抗拒 。 可能係因為佢地甘o岩係同一個生肖，又同屬巨蟹座的關係吧 ( 超神婆的我 ) !!!

人地話：請到個好工人就等同中六合彩，我都唔望發達住.......但求姐姐對我兩個小孩"唔太差"~~~~~希望我揀工人的眼光和運氣，能夠同揀老公的一樣吧~~~~

點解會甘?又發現多一樣....

自從去完廣華覆診之後，個心就成日都唔舒服，所以就即刻Book左過兩日去睇私家醫生照U/S。

醫生話大致一切正常，但U/S就話照到小bie個腎隔離生左粒""唔知咩野""，由於現階段咩都做唔到，所以都係要等到小bie出世之後，再搵兒科醫生follow。

聽到自己骨肉有少少唔妥既時候，我個心當堂實晒，why今次懷著小bie真係一波三折，每次檢查都總會有一些壞消息，令我擔心不已.......

偏偏我就只可以坐o係度等!! 仲要驚到BB出世!! 我最怕就係呢o的無能為力，只可齋聽天由命既事情.........

而家已經進入36週，十月懷胎，媽媽不求甚麼，只希望小Bie你能健健康康，平平安安甘出世~~~~

@35weeks

前兩日去左廣華度做產前檢查，入到去見姑娘既時候，例牌要聽下BB心跳聲，但聽左一陣，唔知係咪部機有問題，姑娘話要換過另一部再聽過....跟住佢用另一部聽左一陣又出左去，再返黎既時候已經同另一個護士長入黎，再用機聽多次，後來佢地又出左去，再返黎既時候，佢地就同我講，話BB心跳係有正常2下，跟住就慢少少，叫我每日都要留意BB有無胎動，如果無郁就要即刻入院。

我本來係跟開助產士小組，但而家佢地話follow唔到我，要我去返大堂睇醫生，我好唔開心，好似被佢地遺棄左甘.......跟左我甘耐，無端端又踢我俾其他人.......

仲有個幾月，小Bie你就出世喇!!!! 我呢幾日都成日亂諗野，屋企人都好擔心，我都想扮無野，但係......我今日都忍唔住問媽媽.......我個女會唔會出唔到世架?? 跟住自己又亂諗，如果我有咩事......嘉嘉點算??? 個腦全部都係o的衰野......唔想訓....唔敢訓....

睇黎我真係要好好控制下自己喇~~~~ 我開始覺得自已有o的產前抑鬱既先兆，好易會因為o的小事而受到困擾，情緒低落，好易喊，甚至會唔想要小bie，覺得佢好麻煩，係一個負擔，一個壓力，成日攪到我好辛苦好唔舒服，亦因為佢既出現，攪亂左我地一家三口原本既生活。仲有成日覺得羊生對我唔夠好....唔體諒我.....又唔陪我....我竟然會諗佢出面係咪有第二個.........

又可能我真係太耐無休息喇.....就算放假都係照樣返舖頭.......自己一個等嘉嘉放學，好似一個星期七日日日都係o係舖頭甘.....或者.....或者過年順便放假抖下會好o的啦~~~嘉嘉.....快o的放假陪我啦~~~~

譚仔雲南米線

 譚仔雲南米線

之前有朋友介紹譚仔，成日都想試

終於品嘗到聞名已久的譚仔米線

冇有識死，唔知頭唔知路，喜好辣的我

點了(中)酸辣

原來真係好鬼辣，仲要愈食愈辣

好刺激，我好鍾意呀

買新鞋，過新年

婆婆話要買返對新鞋仔俾嘉嘉過年著 (又買?? )，於是食完個Lunch，就拖左嘉嘉去 "DR KONG" 度揀鞋，點知嘉嘉唔駛一分鐘 (快得太過分喇)，就睇中左一對有蝴蝶仔既波鞋~~~~~

嘉嘉 ：婆婆，我鐘意呢對呀~~你睇下，有隻蝴蝶架!!!

婆婆  : 係wor~~真係好靚wor~~

文姨姨 : 嘉嘉，你睇埋呢o的吖，鐘唔鐘意呀??

(跟住文姨姨就拎左一對豹紋款，又拎左另一對星星款俾嘉嘉睇)

我 : 嘩~~~呢o的都好靚wor~~~~

嘉嘉 : 係wor~~不過睇下我呢對，有circle同butterfly架 (敷衍完我地，都係拎返o個對蝴蝶波鞋，不停 thank you婆婆去俾錢 )

婆婆俾完錢就問 : 嘉嘉....你係咪之前已經黎睇過，揀定左架?? 諗都唔駛諗就非要o個對不可既??

無辦法啦.....似足我......揀定左就唔好三心兩意嘛 ~~~

病在你身，痛在娘心

嘉嘉每天都發燒、退了又再燒，不經不覺今日已經是第五天了，己經看了第二次醫生，看見她「燒到眼紅紅」的樣子，真係心痛死我呀~~~~幸好嘉嘉燒起來都尚算精神，肯食肯玩，就是晚上燒得比較厲害，全身發燙，手、臉和腳都發滾。

呢幾日我同羊生都無咩點訓覺，晚晚個零鐘就起身幫嘉嘉探一次熱，搞到我條腰勁痛!!!! 所以話小朋友一病，最辛苦既就係o的大人，又擔心又無覺好訓~~~

至於學校的考試，我都沒抱甚麼希望了...... 健康比任何都重要，不過之前辛苦溫習的時間便付諸流水，很不甘心呢!!!! 唯有寄望下學期再努力o的啦~~~

考試.. 先病'-____-.

呢個星期係嘉嘉既第一次校內評估


嘉嘉呀嘉嘉,

點解妳考試先黎病呀? ???我們還要作戰成個星期架~~妳到底有沒有精神繼續溫習呢?

由星期六開始，已經發現嘉嘉有點running nose了，我本來以為只是少少傷風，應該影響唔到妳，點知第二天就聽到妳開始咳了，夜晚仲開始發燒添!!!

MONDAY見妳尚算精神，早上媽媽都迫妳溫習多兩遍，然後再跟妳上學，臨走還叮囑妳要小心做paper，不要粗心大意.....放學第一時間就係關心妳識唔識，然之後先帶妳去看醫生。 晚上溫過習後吃過藥就去睡了；點知嘉嘉又再發燒102-104"......我在掙扎明天應唔應該給嘉嘉上學。

求學根本就係求分數，明知嘉嘉都溫熟考試內容，唔考又好似好唔抵.....明知嘉嘉病到甘.....唔通仲要佢返學??? 分數又係咪真係甘重要???　

開始洗BB衫

@32Week

係時候要開始幫小bie洗衫喇

揀左o的body幫小bie洗左佢先

呢兩袋就係朋友們既捐贈

 

至於我既走路袋，我都唔知點執.....有好多日用品都仲用緊，點執呀?? 我而家執都係執得一半咋，所以我又諗住放埋一邊先，過多一排先執啦，哈哈!!!!!

HOME Studio

今日去左鴨記，羊生買左o的布，然之後返屋企，D.I.Y.左個咱嘉攝影棚

御用的o靚模

大肚相@Fab Studio

自己未大肚前，心想將來大肚我一定要影一輯大肚相作為紀念之用，其實當年懷有嘉嘉的時候，我已經好想去影，畢竟女人懷孕始終是一生中很難得 (( 都唔會生得多啦 )) 及好值得紀念的人生大事，上一胎不過隨便說說想影嘛，羊生就好反感，才會打消念頭。

今次 (( 應該是最後一次大肚 ))，所以，我堅決要去影一輯孕婦寫真!!!!

最後我是如何說服羊生???


全因為早早我已經做了資料搜集，羊生不喜歡到一些有男性攝影師的studio，所以我一直找......一直找.......看到這一間全女班的studio (( 攝影師和化妝師都是女孩子 ))，由女攝影師操刀，就不用怕尷尬了，而且簡簡單單的風格，也很合我們的心水.....

我們都看不到，照片有多性感，有多暴露..... 只是婆婆看了幾張就面色一沉：『著甘少布影相有咩好睇 !!!!』     跟羊生商量很久，照片放不放上在Blog文章，算是我們一家四口的一份紀錄，況且，這個Blog根本不多人看，所以.........豁出去好了 !!!!


我們選擇了在懷孕七個半月的時候拍攝，因為影大肚相最好是在32-34 week之間，當時肚子已經夠大，但又未至於好辛苦好腫。(( 仲有......雖然生左嘉姐仔，但我個肚仲係好靚，而且一條肚紋都無架 ))


當日我們都影得好輕鬆，2個姐姐又會不時氹嘉嘉，整個過程都好smooth，而且嘉姐仔表現非常合作，全都是我心目中想要的效果。


我特別喜愛近這一幅：嘉姐仔至錫妹妹，感覺很warm。


 上次陀嘉嘉無影到，不過現在拍更開心，一次過一家四口大合照


而且我特別鍾意 Fab Studio 的 GRAPHIC 效果


收到的照片看了一次又一次，我和羊生都非常滿意.......感受到那份家庭的暖.......

更期待，小Bie出生後，一家四口浩浩蕩蕩的到影樓........再拍一輯!!!!!!!

妹妹的名字

妹妹既中文名，羊生都係想待佢出世之後先搵師傳改，所以我同嘉嘉淨係幫妹妹諗左個英文名咋!!! 我個人就唔鐘意o個o的奇形怪狀，睇到個名都唔識讀果o的o羅 .......

妹妹既英文名叫 "Debbie"，簡稱 "小 Bie"，小bie......小bie......好可愛呢!!! 嘉嘉都話好架~~~不過都係暫定o者.....可能遲o的都係叫返Melody啦~~~~~ (甘又好似出賣左妹妹年齡の祕密wor )

Debbie被描為可愛，健康，堅強的小孩，我希望小bie將來能開心活潑的成長。

恥骨痛

唉........已經被折磨左兩個星期多了...........

人地成日話大肚婆好辛苦，對我黎講，講真.......陀嘉嘉o個陣我都無咩太大既"辛苦感"，但係陀妹妹呢.......我真係好難受呀!!!! 由開始懷孕經常作小產，懷疑細B性別導致有少少產前抑鬱，而家踏入8個月既時間，我仲多左 "腰骨痛" 同 "恥骨痛" 呢兩個症狀，無論我係企o係度......坐o係度.......行路......訓覺.......無時無刻都會覺得痛痛痛，只不過係痛左兩個禮拜，有些較微既痛已經慣左，可以忍受............最辛苦係o係床上轉身，或者落床去洗手間，每次都痛到雪雪聲.............初期，真係痛到想喊出黎，最慘就係只有自己在叫痛，身邊既人都無法感受到............有次同羊生講想呷下啦，佢竟然答我 : 係甘架啦!!!! ========> 跟住就換黎我一串掃射 h#@&^* ""係甘??你大過肚咩??你知我有幾痛咩?? 可能我陀嘉嘉o個陣真係太過舒服，而家都第二胎，佢就覺得我應該都習慣啦~~~

 

o岩o岩覆診時候問姑娘點算，姑娘話未必個個產婦都有呢個問題，只有部份......(我都知，我陀嘉嘉o個陣都無，真係唔好彩!!!) 另外亦無咩方法治療，因為荷爾蒙令韌帶鬆弛 (以準備BB出世)，只好等生完後D骨同韌帶都生番實先會好......如果真係太痛，只好叫醫生開止痛藥，或者生完後再做物理治療 (Oh......My GOD !!!!!!) 佢話我已經好好，以前有個嚴重o的既 case，個產婦痛到行唔到，生完之後半年都要用拐杖 (下.....真係 touch wood !! ) 希望生完可以快o的好番啦 !!!

 

上網搵下關於恥骨痛既資料，都有o的減輕既方法........

- 睡覺時放置枕頭於兩腿間
- 在床上移動腳和臀部時，應該平行或對稱的行動
- 站立時兩腿要對稱性的站著
- 儘量坐著穿衣
- 慢速移動
- 坐著時背後放置腰枕
- 避免提重物

而家個肚好大啊.....行動又慢.....成隻企鵝甘，真係想細B快o的出黎呀 !!!!!!!!!