避走娘家

話說Auntie已經返左菲律賓開始放大假，要成20日先返黎香港，於是，我就開始我既全職湊女生活((但係我仲係要返工既。。。))


雖知我家夫君好好，從來唔駛我做家頭細務((除左煮飯))，不過對於已經有成兩年唔駛((無))Do既羊生，而家要一站式招呼我地三母女既日常生活，佢就好似從天堂跌進了地獄。佢每日收工返黎，仲要打掃抹地、洗衫掠衫、洗奶樽、同女沖涼‧‧‧‧‧，簡直是「日日做到無停手」，連自已沖涼既時間都沒有，嘉。渟又日嘈夜嘈，在這種「人都癲」的情況下，極高 EQ 的羊生雖然無發脾氣，不過就勁 Black 面，仲成日都無心情同我傾計，我唯有執埋o的行李，帶嘉。渟返娘家暫住，等羊生輕鬆幾天。。。。




其實我自已一拖二帶嘉。渟返工返學真係無咩問題，渟渟都好適應無Auntie陪佢都無扭計((可能之前去旅行都係甘))，而且佢又知道Auntie拎行李係去左搭飛機，所以佢除左第一晚問過Auntie去左邊((我地話佢去左搭飛機))，渟渟就無再問過，晚晚都係我地三個一齊訓到大天光。




嘉。渟知道可以去婆婆屋企「寄宿」好開心！！不過最開心o個個一定係羊生！！！




嘉嘉每日放左學，就同渟渟陪婆婆去買菜買生果。




食完晚飯，文姨姨就同嘉。渟整Cookies。。。。渟渟第一次整餅，玩得勁開心。。。。




最經典是，娘家無浴盆，嘉。渟就用左個洗衫桶黎浸身，佢地覺得超新奇！！！




很感恩，嘉。渟在娘家都可以一覺訓到大天光。其實我原本仲有時間上網寫Blog，不過阿娘屋企部電腦竟然Down左，跟住我都好Down，乖乖地去陪女訓覺。




我同嘉嘉對上一次超過24小時見不到羊生，已經是三年前，羊生因為工作外出訓練，足足離開左我地五日四夜！！當時身處異地的羊生特別想家""嘉""，經常致電回家；今次的""小別""，羊生大概興奮""甩難""勝於一切，事實上，嘉。渟都無咩扭計要搵爸爸。


 

晨早起床，肥爸就車左我們一家人上酒樓飲早茶，真係好鬼早呢。。。。因為阿娘尋晚返夜，今朝先收工，奇怪嘉。渟兩個竟然七點幾就自動自覺起身，氹得公公婆婆好開心。其實自從有左Auntie之後，我就少左好多返娘家陪家人 ((因為渟渟同Auntie成日留在家))，所以呢幾日，公公婆婆對住嘉。渟""飽""番晒，肥爸仲話渟渟""公公公公公公""。。。攻到佢暈 。。。。


人地話，世上只有媽媽好，其實我個個屋企人都對我好好，搞到我話好想搬近o的娘家，到時我連工人都唔駛請，嚇到公公婆婆姨姨面都""青""。。。。。

玩具圖書館

聽聞中央圖書館入面個玩具圖書館好正，反正已經人在銅鑼灣，於是就帶嘉。渟過黎開下眼界。




原來想入玩具圖書館係要booking架！！我地呢o的walk-in客，只可以拎後備飛仔，即係有人無黎先可以輪到我地。




每一節是 45 分鐘，即是我地要排成個鐘頭，不過嘉嘉話好想入去玩，碰巧渟渟又在""午睡""，我地就一邊休息一邊等候，嘉嘉就自已去揀圖書睇。




想入玩具圖書館必需穿上襪子，如果無著襪((我地 ))，可以到地下 G/F 精品部購買，只是$8/pair！！




玩具圖書館是分段開放， 每節45分鐘，最多可容納40人。Blog友可在使用服務前七天內，親臨玩具圖書館 或 致電 2921 0386 預約遊戲時段，每人每日只可預約一節。




初初我仲以為玩具圖書館真係會有 "玩具圖書"，點知原來不過是圖書館入面有個兒童玩具室，同一般club house無咩分別....




雖然我有少少失望，不過小朋友有玩具就好興奮！我見嘉。渟都玩得好開心。如果我是住附近的話，就一定每日都會帶嘉。渟黎玩((始終no-paid好抵))，但如果要山長水遠過海玩，我寧願俾錢去play-house。

一家四口看花展

2008年，也就是5年前，我們帶著8個月大的嘉嘉，到過花展一次[CLICK HERE]

然後，不是忙就是天氣不好，好喜歡去(拍照)的花展，原本已經足足五年沒有捧場了！




慶幸羊生可以抽到時間，趁今年花展結束前，帶我們三母女出省 。

5年沒來，現在已經「先進」得可以用八達通付款入場，成人需要付款$14，嘉嘉(小童)也要付費$7哦~~




o係皇室堡食埋個Lunch先入場，天公不算造美，前一天還是天晴炎熱的，怎麼今天就忽然轉差?? 但也慶幸，想下雨的陰陰天，最終只是灑了幾滴小雨。




5年前，嘉嘉還是一個未懂學行的小Baby；5年後，心肝已經差不多6歲了，而且身旁還多了一個2歲的妹妹...


 

雖然都知道羊生喜愛拍花花草草，不過天色昏暗又冷風陣陣，所以一早跟羊生說，不用拍甚麼花草樹木了，只要跟兩個女兒拍些好照片就好喇！！




可能天氣不是太好，所以人沒有我們想像的多。 我們行得輕鬆之餘，影相都好容易，唔會出現人肉怖景板 or 插針都插唔入的情況。




我覺得這幅香港的""郵票""主題很特別，難得無咩人，可以在此拍張合家照 ....




兩歲的渟渟，好像對花沒有甚麼感覺((玩比較在行))；也不好奇，就連想將手放到花兒上也不大願意...




還是嘉姐仔最""明白""我們的心意。有時候，我真的覺得我們很怪獸，是「攝影怪獸」家長！


 

我覺得整個花展最美最有心思的，就是這個香港賽馬會的花圃，單位用左唔同花朵砌出各款可愛趣致的昆蟲造型，生動有趣(( 還會動的！))，顏色七彩繽紛，難怪吸引了不少人過去拍照。




每年花展的花應該也沒有甚麼變化，唯有要靠特別的花卉造型去吸引人吧??




羊生教嘉嘉親吻小蟲蟲，就成了這張搞笑的照片。




今天嘉。渟的合照很少，而且沒有想像中的美，但我還是比較喜歡看兩姊妹在一起的照片，儘管妹妹都不喜歡望鏡頭，但比起她們各自的獨照，看見姐妹二人的合照，我心會感到溫暖....更覺溫馨！！

期待明年還可以有時間來。。。。。

 

Auntie放大假

轉眼間Auntie已經黎左我地屋企2年，由今日開始，佢就要返菲律賓放假三個星期。




我地真係好幸運，第一次請工人就可以請到Auntie，佢對我地全家人都好好，仲超鍚嘉。渟，其實我已經當左佢係一家人，所以佢返""鄉下""探親，我都買左好多""禮物""俾佢做手信，等佢返得有體面o的。




羊生一朝早仲幫Auntie搬埋行李上巴士，我目送著佢離開，我好想。。。。開香檳慶祝 ！！

好開心！！沒有工人的日子，我可以好好享受全職湊女的生活。。。。我仲同個嘉嘉講，Auntie放假佢要幫手做下家務。。。。

渟渟再度驗癌檢查

今天早上七時，我地就趕往醫院，陪渟渟做CT檢查，所以在檢查前六小時必須禁食。醫生安排了渟渟第一個做檢查，七時半就服藥使她入睡，整個過程大概需要一個半小時。。。。。



我求天父繼續保守，祈求妹妹的癌病不要復發，那一段時間，我們都過著深居簡出的閉關生活。自渟渟""康復""以來，她已經作出了不少突破！我怕渟渟要再做手術和治療，所以趁檢查前先帶嘉。渟搭飛機旅行玩夠開心夠，幸好這幾天渟渟沒有生病，總算一切順利。這大半年來，我們努力令孩子開心，就是想渟渟忘記傷痛，我好害怕要重覆那一段幾乎崩潰的日子。




醫院裡有一個遊戲室，是給這裡的小病人玩的，義工姐姐告訴我，可以跟渟渟入去玩。遊戲室內，大部份孩子都是禿頭和臉色蒼白，卻天真地在笑在玩耍，我看見很難過、亦很害怕。渟渟，拜託你這一仗，一定要鸁！




堅強的妹妹幫手拆""痘仔""，自已要按住傷口。




updated@2013-03-25:

為免大家都擔心渟渟，急不及待要告訴各位一個好消息，我只是因為太耐無update個Blog，其實在25/3，我們已經返左醫院跟醫生面診，他指報告一切正常，現在只需要兩個月覆診一次，渟渟是兒癌病房內的幸運兒，我很感恩........她有機會重過正常的兒童生活。亦祝福其他仍然在跟病魔戰鬥的病友，也可以如渟渟一樣幸運的好起來。

渟渟第一次去南丫島

今天有空就想出去郊外走走，跟嘉。渟呼吸一下新鮮空氣，好像已經有一段時間沒有遊走南丫島，而且渟渟也未曾踏足過，於是我們便出發到碼頭乘船入島去。




雖然已經吃過午餐，但等船期間，嘉。渟兩姊妹流晒口水甘望住一包包掛住的小食，細細聲研究邊款最好味，成功""欺騙""左兩包蝦條。




不過是半個小時的航程，渟渟已經迅速暈左，仲叫極都唔肯起身!! 所以我地到此一遊的合照就係甘。。。。




嘉姐仔又扮細個，趁機坐下車仔先。。。




我們的第一站是吃串燒，渟渟聞到食物香，即刻彈左起身！！




好多人排隊呀，好多款串燒都售罄，又因為即叫即燒，所以要等好耐。




見到對面Shelly Cake Express有開，我地就再轉去食甜品，可能時間不早的關係，好幾款蛋糕都已經售罄了。

我點了一份Cake Set ((曲奇芝士餅 + 菊花蜜))給嘉。渟，我都唔知好唔好食，因為佢地一啖都無留俾我。




店內的面積很小，只有三、四張檯，不過氣氛逍遙，而且裝飾頗不錯，令人感覺很舒服。




老闆娘介紹這個暖暖的蜜糖薑粒蛋糕味道很獨特，蛋糕鬆軟得來帶點咬口，入口充滿蜜糖的香氣，蛋糕內還混有粒粒薑粒，甜中帶點微辣薑味，配搭匹配。




我們沿路往沙灘方向走，繼續逛逛島上的特色小店。




每次來到南丫島，都會去吃呢檔亞婆豆腐花。可惜假日人多，今天的豆腐花都不夠冰凍。




如果不怕有蚊，這兒不失為一個行山後歇歇腳的好地方。




剛剛才去完泰國不久，所以渟渟不用再花時間去適應沙灘，天氣有點涼還末能下水，不過渟渟淨係玩沙都玩得好開心。

黃昏時間，人不算很多，嘉嘉見到沙灘 + 海，已經十級興奮.....加上沒有午睡，情況完全失控。




好想快o的快o的到夏天，到時就可以跟嘉。渟大玩特玩。。。。。嘉嘉常常說她很想住在大海裡面，她很羨慕美人魚，能與大海為伴、魚兒為友。